Launeddas

Unu cuntzertu tantis cuntzertus

Chi pentzaus a is chini in su tempus passau, innantis de nosu ant abbritiau is sonus de canna e si funt postus a ddus sonai, no si ndi podeus stai de sciri sa storia de custus sonus e de cumenti de unu arrogu de canna si siat arribaus a tenni unu strumentu musicali de tanta calidadi.
Su chi eus tentu in eredidadi no est feti unu, ma una cantidadi manna de cuntzertus, tottus diversus intra de issus no sceti po artaria de sonu , ma po teni una diversa scala.

No scideus de seguru cumenti sa familia de is cuntzertus sia nascia e crescia; chi abellu abellu in su tempus o tot’in d’una a segunda de sa genti chi s’agatàt. De seguru depeus totu cantu a a maistus de donnia tempus chi ant aciuntu sonus e sonadas.

Su chi podeus pentzai est ca de medas cuntzertus non s’agatat prus arrastu, intressindis de atrus chi s’imperànt prus de cent’annus a oi, scideus cumenti fiant fattus, ma no scideus ita cosa sonànt.

Custus annus puru si bogant cuntzertus nous foras de sa traditzioni, no sceti po fai sonadas nobas, ma a bortas po podi sonai atras castas de musica cun sonadoris chi no funt sardus o no sonant musica sarda.

Is cuntzertus chi si sighint a sonai funt custus chi sighint:

• Puntu de organu
• Fiorassiu
• Mediana a pipia
• Mediana
• Fiuda
• Ispinellu a pipia
• Ispinellu
• Fiuda bagadia
• Samponia
• Frassetu

Donnia cuntzertu est diversu de is atrus a secunda de su tretu de una crai a s’atra e de su tragiu chi podit fai.
In su cuadru chi sighit (Tav. 1) s’amostant a pari totus is cuntzertus pighendi cumenti a

modellu su tonu de Sol.

 

Chi si castiat cun attentzioni sa tavola 1 si cumprendit ca cun sa mancosedda de ita si bollat cuntzertu si tenint sempiri notas prus artas chi nou cun sa mancosa, foras de Ispinellu e ispinellu a pipia chi bogant sonu prus artu in sa mancosa.

Su tretu musicali prus curtzu si tenit in sa Fiuda (duas otavas de su tumbu a su sonu prus fini de sa mancosedda).

e su prus longu est in sa Fiuda bagadia (tres otavas tra tumbu e sonu prus fini de sa mancosedda).

Me is cuntzertus Fiuda e Fiuda bagadia movendi de s’arrefinu de sa mancosa po lompi a su sonu prus artu de sa mancosedda ddui funt totus is intervallus de sa scala magiori. Is arrefinus tenint un’importantza armonica manna meda.

Is notas insoru cuncordant cun su tumbu candu sonant totu de is tres impari. Is sonus chi bogant is arrefinus funti sempiri aintru de unu de is tres sonus de un’acordu magìori, tenendi cumenti de sonu maistu (tonica) cussu de su tumbu (1° - 3° - 5° gradu). In su fiorassiu su sonu de su tumbu e de is arrefinus de mancosa e mancosedda formant s’acordu magiori (tonica - terza magìori – cuinta).

In su puntu d ’e organu, cun su sonu maistu de su tumbu ddui funt s’otava de sa mancosedda e sa cuinta de sa mancosa.

In sa samponia, mancosa e mancoseda ponint sa cuinta ambas duas.

Fintzas de custus pagus fueddus si cumprendit cumenti donnia cuntzertu tengiat una bisura musicali cosa sua, cun dfferentzias de s’unu a s’atru, chi ddi giaint unu gustu diversu.

Po donnia cuntzertu si podit appretziai sa strutura musicali:

PUNTU DE ORGANU

In su puntu de organu mancosa e mancosedda tenint is proprius tretus musicalis (unicu cuntzertu a teni custa carateristica): tonu-tonu-mesutonu-tonu.

Sa tonica (sonu maistu) bessit da su tumbu, de sa 2a crai de sa mancosa (crai maista) e de s’arrefinu de sa mancosedda.
Custu cuntzertu benit sonau su prusu in su tonu de Fa, Sol, La, Sib.

FIORASSIU

In su Fiorassiu mancosa e mancosedda portant custus tretus musicalis:

Cambiat sceti su tretu de s’arrefinu a sa cuarta crai in ambas duas. In custu cuntzertu, su sonu maistu bessit de su tumbu, de sa crai de susu de sa mancosa e de sa cuarta crai de sa mancosedda.

Custa carateristica serbit po afortiai su sonu maist me is serradas.

Su Fiorassiu est sonau su in prus in Do, Sib, La, prus pagu in Sol e Re.

MEDIANA, MEDIANA A PIPIA, FIUDA

Cuscus tres cuntzertus tenint in cumunu sa mancosa, chi portati is proprius tretus de una mancosa de Puntu de organu de un’otava prus bascia.

Tretu musicali de sa mancosedda de sa mediana::

Sa mancosedda de sa mediana a pipia est simbili a cussa de su Fiorassiu de su propriu tonu.

Su prus de is bortas sa mancosedda de mediana e de mediana a pipia si fait de sa propriu canna, anca si faint 6 stampus istamis de 5. Candu si bolit sonai a mediana su tupat, cun cera, sa crai de susu; chi si olit sonai a mediana a pipia si tupat su stampu de iossu, a modu chi is crais chi sonant siant sempiri 5.

Sa mancosedda de fiuda est gualis a una mancosa de fiorassiu de su propriu tonu.

Cuscus cuntzertus benino sonaus su in prus in tonu de Sib, Do, Re.

ISPINELLU, ISPINELLU A PIPIA, FIUDA BAGADIA

Po custus cuntzertus puru balit su chi est stetiu nau innantis, iaus a nai mancosa gualis po totu e is tres, gualis a una mancosedda de Puntu de organu de su propriu tonu.

Sa mancosedda de Ispinellu est gualis a cussa de una mediana.

Sa mancosedda de Ispinellu a pipia est gualis a una de Fiorassiu de su propriu tonu. In custus cuntzertus pura si faint 6 stampus in sa mancosedda po dda podi sonai a Ispinellu o a Ispinellu a pipia.

Sa mancosedda de Fiuda bagadia est gualis a sa mancosa de unu Fiorassiu, ma una ottava più in artu. Custus cuntzertus si sonant su prus de is bortas in Fa e Sol, prus pagu in La.

SAMPONIA

Sa mancosa de Samponia est cussa de unu Puntu de organu, intressindis sa mancosedda est de unu Fiorassiu. Custu cuntzertu est unu amasturu craru de atrus duus cuntzertus, pagu sonau in di de oi; si podit sonai in Sol, La e Sib.

FRASSETU

Est simbil a unu Punu de organu, sceti ca su tumbu est prus curtzu e atonau un’otava prus a susu. Chi no si seberat unu tonu giustu su sonu est legiu. S’acostumat a sonai in Fa, Mi e Re.

Cuncordia a Launeddas
Imedia sas